[BJT Vol M - 2] [\z M /] [\w II /]
[PTS Vol M - 2] [\z M /] [\f II /]
[PTS Page 196] [\q 196/]
[BJT Page 712] [\x 712/]
Suttantapiṭake
Majjhimanikāyo
Majjhimapaṇṇāsako
5. Brāhmaṇavaggo
Namo tassa bhagavato arahato sammāsambuddhassa.
2.5.9
99 Subhasuttaṃ
Evaṃ me sutaṃ: ekaṃ samayaṃ bhagavā sāvattiyaṃ viharati jetavane anāthapiṇḍikassa ārāme. Tena kho pana samayena subho māṇavo todeyyaputto sāvatthiyaṃ paṭivasati aññatarassa gahapatissa nivesane kenacideva karaṇīyena. Atha kho subho māṇavo todeyyaputto yassa gahapatissa nivesane paṭivasati, taṃ gahapatiṃ etadavoca: sutaṃ metaṃ gahapati, avīvittā sāvatthi arahantehī’ti. Kannu khvajja samaṇaṃ vā brāhmaṇaṃ vā payirupāseyyāmā’ti? [PTS Page 197] [\q 197/]
Ayaṃ bhante, bhagavā sāvatthiyaṃ viharati jetavane anāthapiṇḍikassa ārāme. Taṃ bhante, bhagavantaṃ payirupāsassū’ti.
Atha kho subho māṇavo todeyyaputto tassa gahapatissa paṭissutvā yena bhagavā tenupasaṅkami. Upasaṅkamitvā bhagavatā saddhiṃ sammodi, sammodanīyaṃ kathaṃ sārāṇīyaṃ vītisāretvā ekamantaṃ nisīdi. Ekamantaṃ nisinno kho subho māṇavo tedeyyaputto bhagavantaṃ etadavoca:
Brāhmaṇā bho gotama, evamāhaṃsu: gahaṭṭho ārādhako hoti ñāyaṃ dhammaṃ kusalaṃ, na pabbajito ārādhako hoti ñāyaṃ dhammaṃ kusala’nti. Idha bhavaṃ gotamo kimāhāti?
Vibhajjavādo kho ahamettha māṇava, nāhamettha ekaṃsavādo, gihissa vāhaṃ māṇava, pabbajitassa vā micchāpaṭipattiṃ na vaṇṇemi. Gihī vā hī māṇava, pabbajito vā micchāpaṭipanno micchāpaṭipannādhīkaraṇahetu na ārādhako hoti ñāyaṃ dhammaṃ kusalaṃ. Gihissa vāhaṃ māṇava, pabbajitassa vā sammāpaṭipattiṃ vaṇṇemi. Gihī vā hī māṇava, pabbajito vā sammāpaṭipanno sammāpaṭipannādhikaraṇahetu ārādhako hoti ñāyaṃ dhammaṃ kusala’nti.
Brāhmaṇā bho gotama, evamāhaṃsu:’mahaṭṭhamidaṃ1 mahākiccaṃ mahādhikaraṇaṃ mahāsamārambhaṃ gharāvāsakammaṭṭhānaṃ mahapphalaṃ hoti appaṭṭhamidaṃ appakiccaṃ appādhikaraṇaṃ appasamārambhaṃ pabbajjākammaṭṭhānaṃ appaphalaṃ hotī’ti. Idha bhavaṃ gotamo kimāhāti?
---------------------------
1. Mahaṭṭhaṃ-syā.
[BJT Page 714] [\x 714/]
Etthāpi kho ahaṃ māṇava, vibhajjavādo, nāhamettha ekaṃsavādo. Atthi māṇava, kammaṭṭhānaṃ mahaṭṭhaṃ mahākiccaṃ mahādhikaraṇaṃ mahāsamārambhaṃ vipajjamānaṃ appaphalaṃ hoti. Atthi māṇava, kammaṭṭhānaṃ mahaṭṭhaṃ mahākiccaṃ mahādhikaraṇaṃ mahāsamārambhaṃ sampajjamānaṃ mahapphalaṃ hoti. Atthi māṇava, kammaṭṭhānaṃ appaṭṭhaṃ appakiccaṃ appādhikaraṇaṃ appasamārambhaṃ vipajjamānaṃ appaphalaṃ hoti. Atthi māṇava, kammaṭṭhānaṃ appaṭṭhaṃ appakiccaṃ appādhikaraṇaṃ appasamārambhaṃ sampajjamānaṃ mahapphalaṃ hoti.
Katamañca1 [PTS Page 198] [\q 198/] māṇava, kammaṭṭhānaṃ mahaṭṭhaṃ mahākiccaṃ mahādhikaraṇaṃ mahāsamārambhaṃ vipajjamānaṃ appaphalaṃ hoti: kasī kho māṇava, kammaṭṭhānaṃ mahaṭṭhaṃ mahākiccaṃ mahādhikaraṇaṃ mahāsamārambhaṃ vipajjamānaṃ appaphalaṃ hoti.
Katamañca māṇava, kammaṭṭhānaṃ mahaṭṭhaṃ mahākiccaṃ mahādhikaraṇaṃ mahāsamārambhaṃ sampajjamānaṃ mahappaphalaṃ hoti: kasiyeva kho māṇava, kammaṭṭhānaṃ mahaṭṭhaṃ mahākiccaṃ mahādhikaraṇaṃ mahāsamārambhaṃ vipajjamānaṃ appaphalaṃ hoti.
Katamañca māṇava, kammaṭṭhānaṃ appaṭṭhaṃ appakiccaṃ appādhikaraṇaṃ appasamārambhaṃ vipajjamānaṃ appaphalaṃ hoti: vaṇijjā kho māṇava, kammaṭṭhānaṃ appaṭṭhaṃ appakiccaṃ appādhikaraṇaṃ appasamārambhaṃ vipajjamānaṃ appaphalaṃ hoti.
Katamañca māṇava, kammaṭṭhānaṃ appaṭṭhaṃ appakiccaṃ appādhikaraṇaṃ appasamārambhaṃ sampajjamānaṃ mahappaphalaṃ hoti: vaṇijjāyeva kho māṇava, kammaṭṭhānaṃ appaṭṭhaṃ appakiccaṃ appādhikaraṇaṃ appasamārambhaṃ sampajjamānaṃ mahappaphalaṃ hoti.
Seyyathāpi māṇava, kasi kammaṭṭhānaṃ mahaṭṭhaṃ mahākiccaṃ mahādhikaraṇaṃ mahāsamārambhaṃ vipajjamānaṃ appaphalaṃ hoti: evameva kho māṇava, gharāvāsakammaṭṭhānaṃ mahaṭṭhaṃ mahākiccaṃ mahādhikaraṇaṃ mahāsamārambhaṃ vipajjamānaṃ appaphalaṃ hoti.
Seyyathāpi māṇava, kasiyeva kammaṭṭhānaṃ mahaṭṭhaṃ mahākiccaṃ mahādhikaraṇaṃ mahāsamārambhaṃ sampajjamānaṃ mahapphalaṃ hoti: evameva kho māṇava, gharāvāsakammaṭṭhānaṃ mahaṭṭhaṃ mahākiccaṃ mahādhikaraṇaṃ mahāsamārambhaṃ sampajjamānaṃ mahapphalaṃ hoti.
-------------------------
1. Katamaṃ-syā.
[BJT Page 716] [\x 716/]
Seyyathāpi māṇava, vaṇijjā kammaṭṭhānaṃ appaṭṭhaṃ appakiccaṃ appādhikaraṇaṃ appasamārambhaṃ vipajjamānaṃ appaphalaṃ hoti. Evameva kho māṇava, pabbajjākammaṭṭhānaṃ appaṭṭhaṃ appakiccaṃ appādhikaraṇaṃ appasamārambhaṃ vipajjamānaṃ appaphalaṃ hoti.
Seyyathāpi māṇava, vaṇijjāyeva kammaṭṭhānaṃ appaṭṭhaṃ appakiccaṃ appādhikaraṇaṃ appasamārambhaṃ sampajjamānaṃ mahapphalaṃ hoti. Evameva [PTS Page 199] [\q 199/] kho māṇava, pabbajjā kammaṭṭhānaṃ appaṭṭhaṃ appakiccaṃ appādhikaraṇaṃ appasamārambhaṃ sampajjamānaṃ mahapphalaṃ hoti.
Brāhmaṇā bho gotama, pañca dhamme paññāpenti puññassa kiriyāya kusalassa ārādhanāyāti.
Ye te māṇava, brāhmaṇā pañca dhamme paññāpenti puññassa kiriyāya kusalassa ārādhanāya. Sace te agaru, sādhu te pañca dhamme imasmiṃ parisatiṃ bhāsassūti.
Na kho me bho gotama, garu yatthassu bhavanto vā nisinnā bhavantarūpā vā’ti.
Tena hi māṇava, bhāsassūti.
Saccaṃ kho bho gotama, brāhmaṇā paṭhamaṃ dhammaṃ paññāpenti puññassa kiriyāya kusalassa ārādhanāya. Tapaṃ kho bho gotama, brāhmaṇā dutiyaṃ dhammaṃ paññāpenti puññassa kiriyāya kusalassa ārādhanāya. Brahmacariyaṃ kho bho gotama, brāhmaṇā tatiyaṃ dhammaṃ paññāpenti puññassa kiriyāya kusalassa ārādhanāya. Ajjhesanaṃ kho bho gotama, brāhmaṇā catutthaṃ dhammaṃ paññāpenti puññassa kiriyāya kusalassa ārādhanāya. Cāgaṃ kho bho gotama, brāhmaṇā pañcamaṃ dhammaṃ paññāpenti puññassa kiriyāya kusalassa ārādhanāya. Brāhmaṇā bho gotama, ime pañca dhamme paññāpenti puññassa kiriyāya kusalassa ārādhanāyāti. Idha bhavaṃ gotamo kimāhāti?
Kiṃ pana māṇava, atthi koci brāhmaṇānaṃ ekabrāhmaṇopi yo evamāha: ’ahaṃ imesaṃ pañcannaṃ dhammānaṃ sayaṃ abhiññā sacchikatvā vipākaṃ pavedemī’ti?
No hidaṃ bho gotama.
Kiṃ pana māṇava, atthi koci brāhmaṇānaṃ ekācariyopi ekācariya pācariyopi yāvasattamā ācariyamahayugā, yo evamāha: ahaṃ imesaṃ pañcannaṃ dhammānaṃ sayaṃ abhiññā sacchikatvā vipākaṃ pavedemī’ti.
No hidaṃ bho gotama.
[PTS Page 200] [\q 200/]
[BJT Page 718] [\x 718/]
Kiṃ pana māṇava, yepi te brāhmaṇānaṃ pubbakā isayo mantānaṃ kattāro mantānaṃ pavattāro, yesamidaṃ etarahi brāhmaṇā porāṇaṃ mantapadaṃ gītaṃ pavuttaṃ samihitaṃ tadanugāyanti. Tadanubhāsanti, bhāsitamanubhāsanti, vācitamanuvācenti, seyyathīdaṃ: aṭṭako vāmako vāmadevo vessāmitto yamataggi aṅgīraso bhāradvājo vāseṭṭho kassapo bhagu. Tepi evamāhaṃsu: mayaṃ imesaṃ pañcannaṃ dhammānaṃ sayaṃ abhiññā sacchikatvā vipākaṃ pavedemā’ti?
No hidaṃ bho gotama.
Iti kira māṇava, natthi koci brāhmaṇānaṃ ekabrāhmaṇopi yo evamāha: ahaṃ imesaṃ pañcannaṃ dhammānaṃ sayaṃ abhiññā sacchikatvā vipākaṃ pavedemī’ti. Natthi koci brāhmaṇānaṃ ekācariyopi ekācariyapācariyopi yāvasattamā ācariyamahayugā, yo evamāha: ’ahaṃ imesaṃ pañcannaṃ dhammānaṃ sayaṃ abhiññā sacchikatvā vipākaṃ pavedemī’ti. Yepi te brāhmaṇānaṃ pubbakā isayo mantānaṃ kattāro mantānaṃ pavattāro, yesamidaṃ etarahi brāhmaṇā porāṇaṃ mantapadaṃ gītaṃ pavuttaṃ samihitaṃ tadanugāyanti. Tadanubhāsanti, bhāsitamanubhāsanti, vācitamanuvācenti, seyyathīdaṃ: aṭṭako vāmako vāmadevo vessāmitto yamataggi aṅgīraso bhāradvājo vāseṭṭho kassapo bhagu. Tepi evamāhaṃsu: mayaṃ imesaṃ pañcannaṃ dhammānaṃ sayaṃ abhiññā sacchikatvā vipākaṃ pavedemā’ti?
No hetaṃ bho gotama.
Seyyathāpi māṇava, andhaveṇiparamparā saṃsattā:?1 Purimopi na passati, majjhamopi na passati, pacchimopi na passati. Evameva kho māṇava, andhaveṇūpamaṃ maññe brāhmaṇānaṃ bhāsitaṃ sampajjati. Purimopi na passati, majjhamopi na passati, pacchimopi na passatīti.
Evaṃ vutte subho māṇavo todeyyaputto bhagavatā andhaveṇūpamena vuccamāno kupito anattamano bhagavantaṃyeva khuṃsento bhagavantaṃyeva vambhento bhagavantaṃyeva vadamāno ’samaṇo gotamo pāpito bhavissatī’ti. Bhagavantaṃ etadavoca: brāhmaṇo bho gotama, pokkharasāti opamañño subhagavaniko evamāha: evameva panimeke2 samaṇabrāhmaṇā uttarimanussadhammā alamariyañāṇadassanavisesaṃ paṭijānanti. Tesamidaṃ bhāsitaṃ [PTS Page 201] [\q 201/] hassakaṃyeva sampajjati, nāmakaṃyeva sampajjati, rittakaṃyeva sampajjati, tucchakaṃyeva sampajjati. Kathaṃ hī nāma manussabhūto uttarimanussadhammā alamariyañāṇadassanavisesaṃ ñassati vā dakkhiti3 vā sacchi vā karissati. Netaṃ ṭhānaṃ vijjatī’ti.
-------------------------
1. Sambhattā-syā 2. Panimekacce-machasaṃ 3. Dakkhati-machasaṃ.Dakkhissati-sīmu.
[BJT Page 720] [\x 720/]
Kiṃ pana māṇava, brāhmaṇo pokkharasāti opamañño subhagavaniko sabbesaṃyeva samaṇabrāhmaṇānaṃ cetasā ceto paricca pajānāti’ti.?
Sakāyapi hi bho gotama, puṇṇakāya dāsiyā brāhmaṇo pokkharasāti opamañño subhagavaniko na cetasā ceto paricca pajānāti, kuto pana sabbesaṃyeva samaṇabrāhmaṇānaṃ cetasā ceto paricca pajānissatī’ti.
Seyyathāpi māṇava, jaccandho puriso na passeyya kaṇhasukkāni rūpāni, na passeyya nīlakāni rūpāni, na passeyya pītakāni rūpāni, na passeyya lohītakāni rūpāni, na passeyya mañjeṭṭhakāni rūpāni, na passeyya samavisamaṃ1, na passeyya tārakarūpāni, na passeyya candimasūriye. So evaṃ vadeyya: natthi kaṇhasukkāni rūpāni, natthi kaṇhasukkānaṃ rūpānaṃ dassāvi, natthi nīlakāni rūpāni, natthi nīlakānaṃ rūpānaṃ dassāvī, natthi pītakāni rūpāni, natthi pītakānaṃ rūpānaṃ dassāvi, natthi lohitakāni rūpāni, natthi lohītakānaṃ rūpānaṃ dassāvi. Natthi mañjeṭṭhikāni rūpāni, natthi mañjeṭṭhikānaṃ rūpānaṃ dassāvi, natthi samavisamaṃ, natthi samavisamassa dassāvi, natthi tārakarūpāni, natthi tārakarūpānaṃ dassāvī, natthi candimasūriyā ,natthi candimasūriyānaṃ dassāvi, ahametaṃ na jānāmi, ahametaṃ na passāmi, tasmā natthī’ti. Sammā nu kho so māṇava, vadamāno vadeyyāti?
No hidaṃ bho gātama, atthi kaṇhasukkāni rūpāni, atthi kaṇhasukkānaṃ rūpānaṃ dassāvi, atthi nīlakāni rūpāni, atthi nīlakānaṃ rūpānaṃ dassāvi, atthi pītakāni rūpāni, atthi pītakānaṃ rūpānaṃ dassāvi, atthi lohitakāni rūpāni, atthi lohitakānaṃ rūpānaṃ dassāvi. Atthi mañjeṭṭhikāni rūpāni, atthi mañjeṭṭhikānaṃ rūpānaṃ dassāvi, atthi samavisamaṃ, atthi samavisamassa dassāvi, atthi tārakarūpāni, atthi tārakarūpānaṃ dassāvi, atthi candimasuriyā2, atthi candimasuriyānaṃ dassāvi, ahametaṃ [PTS Page 202] [\q 202/] na jānāmi, ahametaṃ na passāmi tasmā natthī’ti na hi so bho gotama, sammā vadamāno vadeyyāti.
Evameva kho māṇava, brāhmaṇo pokkharasāti opamañño subhagavaniko andho acakkhuko. So vata uttarimanussadhammā alamariyañāṇadassanavisesaṃ ñassati vā dakkhiti3 vā sacchi vā karissatī’ti netaṃ ṭhānaṃ vijjati.
Taṃ kiṃ maññasi māṇava, ye te kosalakā4 brāhmaṇamahāsāḷā seyyathīdaṃ: ’caṅkī brāhmaṇo tārukkho brāhmaṇo pokkharasāti brāhmaṇo jānussoṇi brāhmaṇo pitā vā te todeyyo. Katamā nesaṃ seyyā’yaṃ vā te sammuccā5 vācaṃ bhāseyyuṃ. Yaṃ vā asammuccāti6
Sammuccā bho gotama.
------------------------
1. Samavisamāni-syā,[PTS] 2. Candimasuriyo-sīmu. 3. Dakkhati-machasaṃ 4. Ye pana te kosalikā-syā. 5. Sammusā-sīmu,[PTS] sammucchā-syā 6. Asammusāti-sīmu, [PTS]
[BJT Page 722] [\x 722/]
Katamā tesaṃ seyyo, yaṃ vā te mantā vācaṃ bhāseyyuṃ. Yaṃ vā amantāti?
Mantā bho gotama
Katamā tesaṃ seyyo, yaṃ vā te paṭisaṅkhāya vācaṃ bhāseyyuṃ yaṃ vā apaṭisaṅkhāya vācaṃ bhāseyyuṃ yaṃ vā apaṭisaṅkhāyāti?
Paṭisaṅkhāya bho gotama.
Katamā tesaṃ seyyo, yaṃ vā te atthasaṃhitaṃ vācaṃ bhāseyyuṃ. Yaṃ vā anatthasaṃhitanti?
Atthasaṃhitaṃ bho gotama.
Taṃ kiṃ maññasi māṇava, yadi evaṃ sante brāhmaṇena pokkharasātinā opamaññena subhagavanikena sammuccā vācā bhāsitā, asammuccā vā’ti?
Asammuccā bho gotama
Mantā vācā bhāsitā, amantā vā’ti?
Amantā bho gotama
Paṭisaṅkhāya vācā bhāsitā, apaṭisaṅkhāya vā’ti?
Apaṭisaṅkhāya bho gotama,
Atthasaṃhitā vācā bhāsitā, anatthasaṃhitā vā’ti?
Anatthasaṃhitā bho gotama. [PTS Page 203] [\q 203/]
Pañca kho ime māṇava, nīvaraṇā. Katame pañca: kāmacchandanīvaraṇaṃ byāpādanīvaraṇaṃ thīnamiddhanīvaraṇaṃ uddhaccakukkuccanīvaraṇaṃ vicikicchānīvaraṇaṃ. Ime kho māṇava, pañcanīvaraṇā. Imehi kho māṇava, pañcahi nīvaraṇehi brāhmaṇo pokkharasāti opamañño subhagavaniko āvuto1 nivuto ovuto2 pariyonaddho. So vata uttarimanussadhammā alamariyañāṇadassanavisesaṃ ñassati vā dakkhiti vā sacchi vā karissatīti. Netaṃ ṭhānaṃ vijjati.
-----------------------
1.Āvaṭo-[PTS] 2. Ophuṭo-machasaṃ,syā.Ophuto-[PTS]
[BJT Page 724] [\x 724/]
Pañca kho ime māṇava kāmaguṇā, katame pañca: cakkhuviññeyyā rūpā iṭṭhā kantā manāpā piyarūpā kāmūpasaṃhitā rajanīyā. Sotaviññeyyā saddā iṭṭhā kantā manāpā piyarūpā kāmūpasaṃhitā rajanīyā. Ghānaviññeyyā gandhā iṭṭhā kantā manāpā piyarūpā kāmūpasaṃhitā rajanīyā. Jivhā viññeyyā rasā iṭṭhā kantā manāpā piyarūpā kāmūpasaṃhitā rajanīyā. Kāyaviññeyyā phoṭṭhabbā iṭṭhā kantā manāpā piyarūpā kāmūpasaṃhitā rajanīyā. Ime kho māṇava, pañca kāmaguṇā. Imehi kho māṇava, pañcahi kāmaguṇehi brāhmaṇo pokkharasāti opamañño subhagavaniko gathito1 mucchito ajjhopanno anādīnavadassāvī anissaraṇapañño paribhuñjati. So vata uttarimanussadhammā alamariyañāṇadassanavisesaṃ ñassati vā dakkhiti vā sacchi vā karissatīti netaṃ ṭhānaṃ vijjati.
Taṃ kiṃ maññasi māṇava, yaṃ vā tiṇakaṭṭhūpādānaṃ paṭicca aggiṃ jāleyya, yaṃ vā nissaṭṭhatiṇakaṭṭhūpādānaṃ aggiṃ jāleyya, katamo nu khvāssa aggi accimā ca vaṇṇimā ca pabhassaro cāti?
Sace taṃ bho gotama, ṭhānaṃ nissaṭṭhatiṇakaṭṭhūpādānaṃ aggiṃ jāletuṃ, svāssa aggi accimā ca vaṇṇimā ca pabhassaro cāti.
Aṭṭhānaṃ kho etaṃ māṇava, anavakāso, yaṃ nissaṭṭhatiṇakaṭṭhūpādānaṃ aggiṃ jāleyya aññatra iddhimatā. Seyyathāpi māṇava, tiṇakaṭṭhūpādānaṃ paṭicca aggi jalati, tathūpamāhaṃ māṇava, imaṃ pītiṃ vadāmi. Yāyaṃ pīti pañcakāmaguṇe paṭicca: seyyathāpi māṇava, nissaṭṭhatiṇakaṭṭhūpādānaṃ paṭicca aggi jalati. Tathūpamāhaṃ māṇava, imaṃ pītiṃ vadāmi, yāyaṃ pīti [PTS Page 204] [\q 204/] aññatreva kāmehi aññatra akusalehi dhammehi.
Katamā ca māṇava, pīti aññatreva kāmehi aññatra akusalehi dhammehi: idha māṇava, bhikkhu vivicceva kāmehi vivicca akusalehi dhammehi savitakkaṃ savicāraṃ vivekajaṃ pītisukhaṃ paṭhamaṃ jhānaṃ upasampajja viharati. Ayampi kho māṇava, pīti aññatreva kāmehi aññatra akusalehi dhammehi. Puna ca paraṃ māṇava, bhikkhu vitakkavicārānaṃ vūpasamā ajjhattaṃ sampasādanaṃ cetaso ekodibhāvaṃ avitakkaṃ avicāraṃ samādhijaṃ pītisukhaṃ dutiyaṃ jhānaṃ upasampajja viharati. Ayampi kho māṇava, pīti aññatreva kāmehi aññatra akusalehi dhammehi.
Ye te māṇava, brāhmaṇā pañca dhamme paññāpenti puññassa kiriyāya kusalassa ārādhanāya. Kamettha brāhmaṇā dhammaṃ mahapphalataraṃ paññāpenti puññassa kiriyāya kusalassa ārādhanāyāti
Yeme bho gotama, brāhmaṇā pañca dhamme paññāpenti puññassa kiriyāya kusalassa ārādhanāya, cāgamettha brāhmaṇā dhammaṃ mahapphalataraṃ paññāpenti puññassa kiriyāya kusalassa ārādhanāyāti.
--------------------------
1. Gabhito-syā.
[BJT Page 726] [\x 726/]
Taṃ kiṃ maññasi māṇava, idhaññatarassa brāhmaṇassa mahāyañño paccupaṭṭhito assa. Atha dve brāhmaṇā āgaccheyyuṃ: ’itthannāmassa brāhmaṇassa mahāyaññaṃ anubhavissāmā’ti. Tatrekassa brāhmaṇassa evamassa: ’aho vata ahameva labheyyaṃ bhattagge aggāsanaṃ aggodakaṃ aggapiṇḍaṃ, nāñño brāhmaṇo labheyya1 bhattagge aggāsanaṃ aggodakaṃ aggapiṇḍanti. Ṭhānaṃ kho panetaṃ māṇava, vijjati: ’yaṃ añño brāhmaṇo labheyya bhattagge aggāsanaṃ aggodakaṃ aggapiṇḍaṃ, na so brāhmaṇo labheyya bhattagge aggāsanaṃ aggodakaṃ aggapiṇḍaṃ. Añño brāhmaṇo labhati bhattagge aggāsanaṃ aggodakaṃ aggapiṇḍaṃ, nāhaṃ labhāmi bhattagge aggāsanaṃ aggodakaṃ aggapiṇḍa’nti, iti [PTS Page 205] [\q 205/] so kupito hoti anattamano. Imassa pana māṇava, brāhmaṇā kiṃ vipākaṃ paññāpentī’ti?
Na khottha2 bho gotama, brāhmaṇā evaṃ dānaṃ denti: iminā paro kupito hotu anattamano’ti atha khvettha brāhmaṇā anukampājātikaṃyeva dānaṃ denti’ti.
Evaṃ sante kho māṇava, brāhmaṇānaṃ idaṃ chaṭṭhaṃ puññakiriyāvatthu hoti yadidaṃ anukampājātikanti.
Evaṃ sante bho gotama, brāhmaṇānaṃ idaṃ chaṭṭhaṃ puññakiriyāvatthu hoti yadidaṃ anukampājātikanti.
Ye te māṇava, brāhmaṇā pañca dhamme paññāpenti puññassa kiriyāya kusalassa ārādhanāya. Ime tvaṃ pañca dhamme kattha bahulaṃ samanupassasi3 gahaṭṭhesu vā pabbajitesuvā’ti?
Yeme bho gotama, brāhmaṇā pañca dhamme paññāpenti puññassa kiriyāya kusalassa ārādhanāya, imāhaṃ pañca dhamme pabbajitesu bahulaṃ samanupassāmi appaṃ gahaṭṭhesu. Gahaṭṭho hi bho gotama, mahaṭṭho mahākicco mahādhikaraṇo mahāsamārambho, na satataṃ samitaṃ saccavādī hoti. Pabbajito kho pana bho gotama, appaṭṭho appakicco appādhikaraṇo appasamārambho, satataṃ samitaṃ saccavādī hoti. Gahaṭṭho hi bho gotama, mahaṭṭho mahākicco mahādhikaraṇo mahāsamārambho, na satataṃ samitaṃ tapassī hoti. Pabbajito kho pana bho gotama, appaṭṭho appakicco appādhikaraṇo appasamārambho, satataṃ samitaṃ tapassī hoti. Gahaṭṭho hi bho gotama, mahaṭṭho mahākicco mahādhikaraṇo mahāsamārambho, na satataṃ samitaṃ brahmacārī hoti. Pabbajito kho pana bho gotama, appaṭṭho appakicco appādhikaraṇo appasamārambho, satataṃ samitaṃ brahmacārī hoti. Gahaṭṭho hi bho gotama, mahaṭṭho mahākicco mahādhikaraṇo mahāsamārambho na satataṃ samitaṃ sajjhāya bahulo hoti. Pabbajito kho pana bho gotama, appaṭṭho appakicco appādhikaraṇo appasamārambho, satataṃ samitaṃ sajjhāya bahulo hoti. Gahaṭṭho hi bho gotama, mahaṭṭho mahākicco mahādhikaraṇo mahāsamārambho, na satataṃ samitaṃ cāgabahulo hoti. Pabbajito kho pana bho gotama, appaṭṭho appakicco appādhikaraṇo appasamārambho, satataṃ samitaṃ cāgabahulo hoti. Hoti. Yeme bho gotama, brāhmaṇā4 pañca dhamme paññāpenti puññassa kiriyāya kusalassa ārādhanāya , imāhaṃ pañca dhamme pabbajitesu bahulaṃ samanupassāmi appaṃ gahaṭṭhesūti.
--------------------------
1. Na aññe brāhmaṇā labheyyuṃ - sya 2. Nakhevattha-machasaṃ,syā.[PTS] 3. Samanupassati-sīmu. 4. Samaṇabrāhmaṇā- [PTS]
[BJT Page 728] [\x 728/]
Ye te māṇava, brāhmaṇā pañca dhamme paññāpenti puññassa kiriyāya kusalassa ārādhanāya. Cittassāhaṃ [PTS Page 206] [\q 206/] ete parikkhāre vadāmi. Yadidaṃ cittaṃ averaṃ abyāpajjhaṃ tassa bhāvanāya.
Idha māṇava, bhikkhu saccavādī hoti. So saccavādīmhīti1 labhati atthavedaṃ labhati, dhammavedaṃ, labhati dhammūpasaṃhitaṃ pāmujjaṃ2 yantaṃ kusalūpasaṃhitaṃ pāmujjaṃ, cittassāhaṃ etaṃ parikkhāraṃ vadāmi. Yadidaṃ cittaṃ averaṃ abyāpajjhaṃ tassa bhāvanāya.
Idha māṇava, bhikkhu tapassī hoti. So tapassīmhīti labhati atthavedaṃ labhati, dhammavedaṃ, labhati dhammūpasaṃhitaṃ pāmujjaṃ2 yantaṃ kusalūpasaṃhitaṃ pāmujjaṃ, cittassāhaṃ etaṃ parikkhāraṃ vadāmi. Yadidaṃ cittaṃ averaṃ abyāpajjhaṃ tassa bhāvanāya.
Idha māṇava, bhikkhu brahmacārī hoti. So brahmacārīmhīti labhati atthavedaṃ labhati, dhammavedaṃ, labhati dhammūpasaṃhitaṃ pāmujjaṃ2 yantaṃ kusalūpasaṃhitaṃ pāmujjaṃ, cittassāhaṃ etaṃ parikkhāraṃ vadāmi. Yadidaṃ cittaṃ averaṃ abyāpajjhaṃ tassa bhāvanāya.
Idha māṇava, bhikkhu sajjhāyabahulo hoti. So sajjhāyabahulomhīti labhati atthavedaṃ labhati, dhammavedaṃ, labhati dhammūpasaṃhitaṃ pāmujjaṃ2 yantaṃ kusalūpasaṃhitaṃ pāmujjaṃ, cittassāhaṃ etaṃ parikkhāraṃ vadāmi. Yadidaṃ cittaṃ averaṃ abyāpajjhaṃ tassa bhāvanāya.
Idha māṇava, bhikkhu cāgabahulo hoti. So cāgabahulomhīti labhati atthavedaṃ labhati, dhammavedaṃ, labhati dhammūpasaṃhitaṃ pāmujjaṃ2 yantaṃ kusalūpasaṃhitaṃ pāmujjaṃ, cittassāhaṃ etaṃ parikkhāraṃ vadāmi. Yadidaṃ cittaṃ averaṃ abyāpajjhaṃ tassa bhāvanāya.
Ye te māṇava, brāhmaṇā pañca dhamme paññāpenti puññassa kiriyāya kusalassa ārādhanāya. Cittassā’haṃ ete parikkhāre vadāmi yadidaṃ cittaṃ averaṃ abyāpajjhaṃ tassa bhāvanāyāti.
Evaṃ vutte subho māṇavo todeyyaputto bhagavantaṃ etadavoca: sutaṃ metaṃ bho gotama, samaṇo gotamo brahmānaṃ sahavyatāya maggaṃ jānātīti.3.
Taṃ kiṃ maññasi māṇava, āsanne ito naḷakāragāmo, nayito dūre naḷakāragāmoti?
Evaṃ bho. Āsanne ito naḷakāragāmo, nayito dūre naḷakāragāmoti.
Taṃ kiṃ maññasi māṇava, idhassa4 puriso naḷakāragāme jātavaddho5 tamenaṃ naḷakāragāmato tāvadeva avasaṭaṃ6 naḷakāragāmassa maggaṃ puccheyyuṃ. Siyā nu kho māṇava, tassa purisassa naḷakāragāme jātavaddhassa naḷakāragāmassa maggaṃ puṭṭhassa dandhāyitattaṃ vā vitthāyitattaṃ vāti?
No hidaṃ bho gotama, taṃ kissa hetu: asu hi bho gotama, puriso naḷakāragāme jātavaddho tassa sabbāneva naḷakāragāmassa maggāni suviditānī’ti.
-------------------------
1. Saccavādīmhīti-sīmu,syā 2. Pāmojjaṃ-machasaṃ 3. Pajānātīti-syā 4. Idhakhvassa-syā. 5. Jātasaṃvaḍḍho-syā. 6. Apasattaṃ-syā.
[BJT Page 730] [\x 730/]
Siyā nu kho māṇava, tassa purisassa naḷakāragāme jātavaddhassa naḷakāragāmassa maggaṃ puṭṭhassa dandhāyitattaṃ [PTS Page 207] [\q 207/] vā vitthāyitattaṃ vā, na tveva tathāgatassa brahmalokaṃ vā brahmalokagāminiṃ vā paṭipadaṃ puṭṭhassa dandhāyitattaṃ vā vitthāyitattaṃ vā. Brahmānaṃ cāhaṃ māṇava, pajānāmi, brahmalokañca brahmalokagāminiñca paṭipadaṃ. Yathā paṭipanno ca brahmā brahmalokaṃ upapanno, tañca pajānamī’ti.
’Sutaṃ metaṃ bho gotama, samaṇo gotamo brahmāṇaṃ sahavyatāya maggaṃ desetī’ti. Sādhu me bhavaṃ gotamo brahmānaṃ sahavyatāya maggaṃ desetu’ti.
Tena hi māṇava, suṇāhi, sādhukaṃ manasi karohi, bhāsissāmīti.
Evaṃ bhoti kho subho māṇavo todeyyaputto bhagavato paccassosi.
Bhagavā etadavoca: ’katamo ca māṇava, brahmānaṃ sahavyatāya maggo: idha māṇava, bhikkhu mettāsahagatena cetasā ekaṃ disaṃ pharitvā viharati. Tathā dutiyaṃ, tathā tatiyaṃ, tathā catutthiṃ. Iti uddhamadho tiriyaṃ sabbadhi sabbattatāya1 sabbāvantaṃ lokaṃ mettā sahagatena cetasā vipulena mahaggatena appamāṇena averena abyāpajjhena pharitvā viharati. Evaṃ bhāvitāya kho māṇava, mettāya cetovimuttiyā yaṃ pamāṇakataṃ kammaṃ, na taṃ tatrāvasissati. Na taṃ tatrāvatiṭṭhati.
Seyyathāpi māṇava, balavā saṅkhadhamo appakasireneva catuddisā2 viññāpeyya. Evameva kho māṇava, evaṃ bhavitāya mettāya ceto vimuttiyā, yaṃ pamāṇakataṃ kammaṃ na taṃ tatrāvasissati. Na taṃ tatrāvatiṭṭhati. Ayampi kho māṇava, brahmāṇaṃ sahavyatāya maggo.
Punacaparaṃ māṇava, bhikkhu karuṇāsahagatena cetasā ekaṃ disaṃ pharitvā viharati. Tathā dutiyaṃ tathā tatiyaṃ tathā catutthiṃ. Iti uddhamadho tiriyaṃ sabbadhi sabbattatāya4 sabbāvantaṃ lokaṃ karuṇāsahagatena cetasā vipulena mahaggatena [PTS Page 208] [\q 208/] appamāṇena averena abyāpajjhena pharitvā viharati. Evaṃ bhāvitāya kho māṇava, karuṇāya cetovimuttiyā yaṃ pamāṇakataṃ kammaṃ, na taṃ tatrāvasissati, na taṃ tatrāvatiṭṭhati. Seyyathāpi māṇava, balavā saṅkhadhamo appakasireneva catuddisā viññāpeyya. Evameva kho māṇava, evaṃ bhāvitāya karuṇāya cetovimuttiyā yaṃ pamāṇakataṃ kammaṃ, na taṃ tatrāvasissati, na taṃ tatrāvatiṭṭhati. Ayampi kho māṇava, brāhmānaṃ sahavyatāya maggoti.
Punacaparaṃ māṇava bhikkhu muditāsahagatena cetasā ekaṃ disaṃ pharitvā viharati. Tathā dutiyaṃ tathā tatiyaṃ tathā catutthiṃ. Iti uddhamadho tiriyaṃ sabbadhi sabbattatāya4 sabbāvantaṃ lokaṃ muditāsahagatena cetasā vipulena mahaggatena appamāṇena averena abyāpajjhena pharitvā viharati. Evaṃ bhāvitāya kho māṇava, muditāya cetovimuttiyā yaṃ pamāṇakataṃ kammaṃ, na taṃ tatrāvasissati, na taṃ tatrāvatiṭṭhati. Seyyathāpi māṇava, balavā saṅkhadhamo appakasireneva catuddisā viññāpeyya. Evameva kho māṇava, evaṃ bhāvitāya muditāya cetovimuttiyā yaṃ pamāṇakataṃ kammaṃ, na taṃ tatrāvasissati, na taṃ tatrāvatiṭṭhati. Ayampi kho māṇava, brāhmāṇaṃ sahavyatāya maggoti.
Punacaparaṃ māṇava, bhikkhu upekkhāsahagatena cetasā ekaṃ disaṃ pharitvā viharati. Tathā dutiyaṃ tathā tatiyaṃ tathā catutthiṃ. Iti uddhamadho tiriyaṃ sabbadhi sabbattatāya4 sabbāvantaṃ lokaṃ upekkhāsahagatena cetasā vipulena mahaggatena appamāṇena averena abyāpajjhena pharitvā viharati. Evaṃ bhāvitāya kho māṇava, upekkhāya cetovimuttiyā yaṃ pamāṇakataṃ kammaṃ, na taṃ tatrāvasissati, na taṃ tatrāvatiṭṭhati. Seyyathāpi māṇava, balavā saṅkhadhamo appakasireneva catuddisā viññāpeyya. Evameva kho māṇava, evaṃ bhāvitāya upekkhāya cetovimuttiyā yaṃ pamāṇakataṃ kammaṃ, na taṃ tatrāvasissati, na taṃ tatrāvatiṭṭhati. Ayampi kho māṇava, brāhmānaṃ sahavyatāya maggoti.
-------------------------
1. Sabbatthāya-sīmu,syā. 2. Cātuddisā-syā.
[BJT Page 732] [\x 732/]
Evaṃ vutte subho māṇavo todeyyaputto bhagavantaṃ etadavoca: abhikkantaṃ bho gotama abhikkantaṃ bho gotama, seyyathāpi bho gotama nikkujjitaṃ vā ukkujjeyya, paṭicchannaṃ vā vivareyya, mūḷhassa vā maggaṃ ācikkheyya’ andhakāre vā telapajjotaṃ dhāreyya, ’cakkhumanto rūpāni dakkhintī’ti, evamevaṃ bhotā gotamena anekapariyāyena dhammo pakāsito. Esāhaṃ bhavantaṃ gotamaṃ saraṇaṃ gacchāmi dhammañca bhikkhusaṅghañca. Upāsakaṃ maṃ bhavaṃ gotamo dhāretu ajjatagge pāṇupetaṃ saraṇaṃ gataṃ. Handa cadāni mayaṃ bho gotama, gacchāma, bahukiccā mayaṃ bahukaraṇiyyāti.
Yassadāni tvaṃ māṇava, kālaṃ maññasīti.
Atha kho subho māṇavo todeyyaputto bhagavato bhāsitaṃ abhinanditvā anumoditvā uṭṭhāyāsanā bhagavantaṃ abhivādetvā padakkhiṇaṃ katvā pakkāmi.
Tena kho pana samayena jānussoṇi brāhmaṇo sabbasetena valabhīrathena2 sāvatthiyā niyyāti divādivassa. Addasā kho jānussoṇi brāhmaṇo subhaṃ māṇavaṃ todeyyaputtaṃ dūratova āgacchantaṃ. Disvāna subhaṃ māṇavaṃ todeyyaputtaṃ etadavoca: ’handa kuto nu bhavaṃ bhāradvājo āgacchati divādivassāti?
Ito hi kho bho, ahaṃ āgacchāmi samaṇassa gotamassa sannikāti.
Taṃ kiṃ maññasi bhavaṃ bhāradvājo samaṇassa gotamassa paññāveyyattiyaṃ paṇḍito maññeti? [PTS Page 209] [\q 209/]
Ko cāhaṃ bho, ko ca samaṇassa gotamassa paññāveyyattiyaṃ jānissāmi. Sopi nūnassa tādisova, yo samaṇassa gotamassa paññāveyyattiyaṃ jāneyyāti.
Uḷārāya khalu bhavaṃ bhāradvājo samaṇaṃ gotamaṃ pasaṃsāya pasaṃsatīti.
Ko cāhaṃ bho, ko ca samaṇaṃ gotamaṃ pasaṃsissāmi. Pasatthapasattho ca so bhavaṃ gotamo, seṭṭho devamanussānaṃ, ye cime bho brāhmaṇa, pañca dhamme paññāpenti puññassa kiriyāya kusalassa ārādhanāya. Cittassa te samaṇo gotamo parikkhāre vadeti. Yadidaṃ cittaṃ averaṃ abyāpajjhaṃ tassa bhāvanāyāti.
----------------------------
1. Dakkhantīti-syā 2. Vaḷavābhirathena-machasaṃ,[PTS]
[BJT Page 734] [\x 734/]
Evaṃ vutte jāṇussoṇī brāhmaṇo sabbasetā vaḷabhīrathā1. Orohitvā ekaṃsaṃ uttarāsaṅgaṃ karitvā yena bhagavā tenañjaliṃ paṇāmetvā udānaṃ udānesi. Lābhā rañño pasenadissa kosalassa suladdhalābhā rañño pasenadissa kosalassa, yassa vijite tathāgato viharati arahaṃ sammāsambuddho’ti.
Subhasuttaṃ navamaṃ.
-------------------------
1. Vaḷavāhirathā-machasaṃ, [PTS]