[PTS Vol S - 5] [\z S /] [\f V /]
[PTS Page 414] [\q 414/]
[BJT Vol S 5-2] [\z S /] [\w Vb /]
[BJT Page 260] [\x 260/]
Suttantapiṭake
Saṃyuttanikāyo
Pañcamabhāge-dutiyo kaṇḍo
Mahāvaggo
12. Saccasaṃyuttaṃ
1. Samādhivaggo
Namo tassa bhagavato arahato sammāsambuddhassa.
12. 1. 1
[PTS Page 414] [\q 414/]
Samādhisuttaṃ
3643. Evaṃ me sutaṃ ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. Atha kho bhagavā bhikkhū āmantesi bhikkhavoti. Bhadanteti kho te bhikkhū bhagavato paccassosuṃ bhagavā etadavoca. Samādhiṃ bhikkhave, bhāvetha. Samāhito bhikkhave, bhikkhu yathābhūtaṃ pajānāti. Kiñca yathābhūtaṃ pajānāti: idaṃ dukkhanti yathābhūtaṃ pajānāti. Ayaṃ dukkhasamudayoti yathābhūtaṃ pajānāti. Ayaṃ dukkhanirodhoti yathābhūtaṃ pajānāti. Ayaṃ dukkhanirodhagāminī paṭipadāti yathābhūtaṃ pajānāti. Samādhiṃ bhikkhave bhāvetha, samāhito bhikkhave, bhikkhu yathābhūtaṃ pajānāti.
Tasmātiha bhikkhave, idaṃ dukkhanti yogo karaṇīyo, ayaṃ dukkhasamudayoti yogo karaṇīyo, ayaṃ dukkhanirodhoti yogo karaṇīyo, ayaṃ dukkhanirodhagāminī paṭipadāti yogo karaṇīyoti.
12. 1. 2
Paṭisallānasuttaṃ
[PTS Page 415] [\q 415/]
3844. Paṭisallāne bhikkhave, yogamāpajjatha, paṭisallīno bhikkhave, bhikkhu yathābhūtaṃ pajānāti. Kiñca yathābhūtaṃ pajānāti: idaṃ dukkhanti yathābhūtaṃ pajānāti. Ayaṃ dukkhasamudayoti yathābhūtaṃ pajānāti. Ayaṃ dukkhanirodhoti yathābhūtaṃ pajānāti. Ayaṃ dukkhanirodhagāminī paṭipadāti yathābhūtaṃ paṭipadāti yathābhūtaṃ pajānāti. Paṭisallāne bhikkhave, yogamāpajjatha, paṭisallīno1 bhikkhave, bhikkhu yathābhūtaṃ pajānāti. Tasmātiha bhikkhave, idaṃ dukkhanti yogo karaṇīyo ayaṃ dukkhasamudayoti yogo karaṇīyo, ayaṃ dukkhanirodhoti yogo karaṇīyo, ayaṃ dukkhanirodhagāminī paṭipadāti yogo karaṇīyoti.
12. 1. 3
Kulaputtasuttaṃ
3845. Yehi keci bhikkhave, atītamaddhānaṃ kulaputtā sammā agārasmā anagāriyaṃ pabbajiṃsu, sabbe te catunnaṃ ariyasaccānaṃ yathābhūtaṃ abhisamayāya. Ye hi keci bhikkhave, anāgatamaddhānaṃ kulaputtā sammā agārasmā anagāriyaṃ pabbajissanti, sabbe te catunnaṃ ariyasaccānaṃ yathābhūtaṃ abhisamayāya. Ye hi keci bhikkhave, etarahi kulaputtā sammā agārasmā anagāriyaṃ pabbajanti, sabbe te catunnaṃ ariyasaccānaṃ yathābhūtaṃ abhisamayāya.
--------------------------
1. Paṭisalalāno-sīmu.
[BJT Page 262] [\x 262/]
Katamesaṃ catunnaṃ: dukkhassa ariyasaccassa, dukkhasamudayassa ariyasaccassa, dukkhanirodhassa ariyasaccassa, dukkhanirodhagāminiyā paṭipadāya1 ariyasaccassa. Ye hi keci bhikkhave, atītamaddhānaṃ kulaputtā sammā agārasmā anagāriyaṃ pabbajiṃsu sabbe te imesaṃ yeva catunnaṃ ariyasaccānaṃ yathābhūtaṃ abhisamayāya. Ye hi keci bhikkhave, anāgatamaddhānaṃ kulaputtā sammā agārasmā anagāriyaṃ pabbajissanti, sabbe te imesaṃ yeva catunnaṃ ariyasaccānaṃ yathābhūtaṃ abhisamayāya. Ye hi keci bhikkhave, etarahi kulaputtā sammā agārasmā anagāriyaṃ pabbajanti, sabbe te imesaṃ yeva catunnaṃ ariyasaccānaṃ yathābhūtaṃ abhisamayāya. Tasmātiha bhikkhave, idaṃ dukkhanti yogo karaṇīyo, ayaṃ dukkhasamudayoti yogokaraṇīyo, ayaṃ dukkhanirodhoti yogokaraṇīyo, ayaṃ dukkhanirodhagāminī paṭipadāti yogo karaṇīyoti.
12. 1. 4
Dutiya kulaputtasuttaṃ
3846. Ye hi keci bhikkhave, atītamaddhānaṃ kulaputtā sammā agārasmā anagāriyaṃ pabbajitā yathābhūtaṃ abhisamesuṃ, sabbe te cattāri ariyasaccāni yathābhutaṃ abhisamesuṃ. Ye hi keci bhikkhave, anāgatamaddhānaṃ kulaputtā sammā agārasmā anagāriyaṃ pabbajitā yathābhūtaṃ [PTS Page 416] [\q 416/] abhisamessanti, sabbe te cattāri ariyasaccāni yathābhūtaṃ abhisamessanti. Ye hi keci bhikkhave, etarahi kulaputtā sammā agārasmā anagāriyaṃ pabbajitā yathābhūtaṃ abhisamenti, sabbe te cattāri ariyasaccāni yathābhūtaṃ abhisamenti. Katamāni cattāri: dukkhaṃ ariyasaccaṃ, dukkhasamudayaṃ ariyasaccaṃ, dukkhanirodhaṃ ariyasaccaṃ, dukkhanirodhagāminī paṭipadā ariyasaccaṃ. Ye hi keci bhikkhave, atītamaddhānaṃ kulaputtā sammā agārasmā anagāriyaṃ pabbajitā yathābhūtaṃ abhisamesuṃ, sabbe te imāni cattāri ariyasaccāni yathābhūtaṃ abhisamesuṃ. Ye hi keci bhikkhave, anāgatamaddhānaṃ kulaputtā sammā agārasmā anagāriyaṃ pabbajitā yathābhūtaṃ abhisamessanti. Sabbe te imāni cattāri ariyasaccāni yathābhūtaṃ abhisamessanti. Ye hi keci bhikkhave, etarahi kulaputtā sammā agārasmā anagāriyaṃ pabbajitā yathābhūtaṃ abhisamenti, sabbe te imāni cattāri ariyasaccāni yathābhūtaṃ abhisamenti. Tasmātiha bhikkhave, idaṃ dukkhanti yogo karaṇīyo, ayaṃ dukkhasamudayoti yogo karaṇīyo, ayaṃ dukkhanirodhoti yogo karaṇīyo, ayaṃ dukkhanirodhagāminī paṭipadāti yogo karaṇīyoti.
12. 1. 5
Samaṇabrāhmaṇasuttaṃ
3847. Ye hi keci bhikkhave, atītamaddhānaṃ samaṇā vā brāhmaṇā va yathābhūtaṃ abhisambujjhiṃsu, sabbe te cattāri ariyasaccāni yathābhunaṃ abhisambujjhiṃsu. Ye hi keci bhikkhave, anāgatamaddhānaṃ samaṇā vā brāhmaṇā vā yathābhūtaṃ abhisambujjhissati, sabbe te cattāri ariyasaccāni yathābhūtaṃ abhisambujjhissanti, ye hi keci bhikkhave, etarahi samaṇā vā brāhmaṇā vā yathābhūtaṃ abhisambujjhanti, sabbe te cattāri ariyasaccāni yathābhūtaṃ abhisambujjhanti. Katamāni cattāri: dukkhaṃ ariyasaccaṃ, dukkhasamudayaṃ ariyasaccaṃ, dukkhanirodhaṃ ariyasaccaṃ, dukkhanirodhagāminī paṭipadā ariyasaccaṃ. Ye hi keci bhikkhave, atītamaddhānaṃ samaṇā vā brāhmaṇā vā yathābhūtaṃ abhisambujjhiṃsu, sabbe te imāni cattāri ariyasaccāni yathābhūtaṃ abhisambujjhiṃsu. Ye hi keci bhikkhave, anāgatamaddhānaṃ samaṇā vā brāhmaṇā vā yathābhūtaṃ abhisambujjhissanti. Sabbe te imāni cattāri ariyasaccāni yathābhūtaṃ abhisambujjhissanti. Ye hi keci bhikkhave,
Etarahi samaṇā vā brāhmaṇā vā yathābhūtaṃ abhisambujjhanti. Sabbe te imāni cattāri [PTS Page 417] [\q 417/] ariyasaccāni yathābhūtaṃ abhisambujjhanti. Tasmātiha bhikkhave, idaṃ dukkhanti yogo karaṇīyo, ayaṃ dukkhasamudayoti yogo karaṇīyo, ayaṃ dukkhanirodhoti yogo karaṇīyo, ayaṃ dukkhanirodhagāminī paṭipadāti yogo karaṇīyoti.
--------------------------
1. Gāminīpaṭipadāya-syā
[BJT Page 264] [\x 264/]
12. 1. 6
Dutiya samaṇabrāhmaṇasuttaṃ
3848. Ye hi keci bhikkhave, atītamaddhānaṃ samaṇā vā brāhmaṇā vā yathābhūtaṃ abhisambuddhaṃ pakāsesuṃ, sabbe te cattāri ariyasaccāni yathābhūtaṃ abhisambuddhaṃ pakāsesuṃ. Ye hi keci bhikkhave, anāgatamaddhānaṃ samaṇā vā brāhmaṇā vā yathābhūtaṃ abhisambuddhaṃ pakāsessanti, sabbe te cattāri ariyasaccāni yathābhūtaṃ abhisambuddhaṃ pakāsessanti. Ye hi keci bhikkhave, etarahi samaṇā vā brahmaṇā vā yathābhūtaṃ abhisambuddhaṃ pakāsenti, sabbe te cattāri ariyasaccāni yathābhūtaṃ abhisambuddhaṃ pakāsenti. Katamāni cattāri: dukkhaṃ ariyasaccaṃ, dukkhasamudayaṃ ariyasaccaṃ, dukkhanirodhaṃ ariyasaccaṃ dukkhanirodhagāminī paṭipadā ariyasaccaṃ. Ye hi keci bhikkhave, atītamaddhānaṃ samaṇā vā brāhmaṇā vā yathābhūtaṃ abhisambuddhaṃ pakāsesuṃ, sabbe te imāni cattāri ariyasaccāni yathābhūtaṃ abhisambuddhaṃ pakāsesuṃ, ye hi keci bhikkhave, anāgatamaddhānaṃ samaṇā vā brāhmaṇā vā yathābhūtaṃ abhisambuddhaṃ pakāsessanti, sabbe te imāni cattāri ariyasaccāni yathābhūtaṃ abhisambuddhaṃ pakāsessanti. Ye hi keci bhikkhave, etarahi samaṇā vā brāhmaṇā vā yathābhūtaṃ abhisambuddhaṃ pakāsenti, sabbe te imāni cattāri ariyasaccāni yathābhūtaṃ abhisambuddhaṃ pakāsenti. Tasmātiha bhikkhave, idaṃ dukkhanti yogo karaṇīyo, ayaṃ dukkhasamudayoti yogo karaṇīyo, ayaṃ dukkhanirodhoti yogo karaṇīyo, ayaṃ dukkhanirodhagāminī paṭipadāti yogo karaṇīyoti.
12. 1. 7
Vitakkasuttaṃ
3849. Mā bhikkhave, pāpake akusale vitakke vitakketha. Seyyathīdaṃ: kāmavitakkaṃ vyāpādavitakkaṃ. Taṃ kissa hetu, nete bhikkhave, vitakkā atthasaṃhitā nādibrahmacariyakā na [PTS Page 418] [\q 418/] nibbidāya na virāgāya na nirodhāya na upasamāya na abhiññāya na sambodhāya na nibbānāya saṃvattanti. Vitakkento1 ca kho tumhe bhikkhave, idaṃ dukkhanti vitakkeyyātha, ayaṃ dukkhasamudayoti vitakkeyyātha, ayaṃ dukkhanirodhoti vitakkeyyātha, ayaṃ dukkhanirodhagāminī paṭipadāti vitakkeyyātha. Taṃ kissa hetu ete bhikkhave, vitakkā atthasaṃhitā ete ādibrahmacariyakā. Ete nibbidāya virāgāya nirodhāya upasamāya abhiññāya sambodhāya nibbānāya saṃvattanti. Tasmātiha bhikkhave, idaṃ dukkhanti yogo karaṇīyo, ayaṃ dukkhasamudayoti yogo karaṇīyo, ayaṃ dukkhanirodhoti yogo karaṇīyo, ayaṃ dukkhanirodhagāminī paṭipadāti yogo karaṇīyoti.
--------------------------
1. Vitakkantā syā. Vitakkenti-sī1, 2,
[BJT Page 266] [\x 266/]
12. 1. 8
Cintāsuttaṃ
3850. Mā bhikkhave, pāpakaṃ akusalaṃ cittaṃ cintetha1. "Sassato lokoti vā, asassato lokoti vā, antavā lokoti vā, anantavā lokoti vā, taṃ jīvaṃ taṃ sarīranti vā, aññaṃ jīvaṃ aññaṃ sarīranti vā, hoti tathāgato parammaraṇāti vā, na hoti tathāgato parammaraṇāti vā, hoti ca na ca hoti tathāgato parammaraṇāti vā, neva hoti na na hoti tathāgato parammaraṇāti vā. Taṃ kissa hetu: nesā bhikkhave, cintā atthasaṃhitā, nādibrahmacariyakā, na nibbidāya na virāgāya na nirodhāya na upamāya na abhiññāya na sambodhāya na nibbānāya saṃvattati. Cintentā ca vo tumhe bhikkhave idaṃ dukkhanti cinteyyātha, ayaṃ dukkhasamudayoti cinteyyātha, ayaṃ dukkhanirodhoti cinteyyātha, ayaṃ dukkhanirodhagāminī paṭipadāti cinteyyātha. Taṃ kissa hetu, esā bhikkhave, cintā atthasaṃhitā, esā ādibrahmacariyakā, esā nibbidāya virāgāya nirodhāya upasamāya abhiññāya [PTS Page 419] [\q 419/] sambodhāya nibbānāya saṃvattati. Tasmātiha bhikkhave, idaṃ dukkhanti yogo karaṇīyo, ayaṃ dukkhasamudayoti yogo karaṇīyo, ayaṃ dukkhanirodhoti yogo karaṇīyo, ayaṃ dukkhanirodhagāminī paṭipadāti yogo karaṇīyoti.
12. 1. 9
Viggāhikakathāsuttaṃ
3851. Mā bhikkhave, viggāhikakathaṃ kathetha:2 "na tvaṃ imaṃ dhammavinayaṃ ājānāsi, ahaṃ imaṃ dhammavinayaṃ ājānāmi, kiṃ tvaṃ imaṃ dhammavinayaṃ ājānissasi? Micchāpaṭipanno tvamasi, ahamasmi sammā paṭipanno pure vacanīyaṃ pacchā avaca, pacchā vacanīyaṃ pure avaca, sahitaṃ me, asahitaṃ te, āciṇṇaṃ te viparāvattaṃ, āropito te vādo, cara vādappamokkhāya3, niggahitosi, nibbaṭhehi sace pahosīti. Taṃ kissa hetu: nesā bhikkhave kathā atthasaṃhitā nādibrahmacariyakā. Na nibbidāya na virāgāya na nirodhāya na upasamāya na abhiññāya na sambodhāya na nibbānāya saṃvattati. Kathentā ca kho tumhe bhikkhave, idaṃ dukkhanti katheyyātha. Ayaṃ dukkhasamudayoti katheyyātha, ayaṃ dukkhanirodhoti katheyyātha, ayaṃ dukkhanirodhagāminī paṭipadāti katheyyātha. Taṃ kissa hetu, esā bhikkhave. Kathā atthasaṃhitā, esā ādibrahmacariyakā, esā nibbidāya virāgāya nirodhāya upasamāya abhiññāya sambodhāya nibbānāya saṃvattati. Tasmātiha bhikkhave, idaṃ dukkhanti yogo karaṇīyo, ayaṃ dukkhasamudayoti yogo karaṇīyo, ayaṃ dukkhanirodhoti yogo karaṇīyo, ayaṃ dukkhanirodhagāminī paṭipadāti yogo karaṇīyoti.
--------------------------
1. Cinteyyātha-machasaṃ,
2. Katheyyātha-machasaṃ
3. Paravādappamokkhāya-syā, 1. Sīmu
[BJT Page 268] [\x 268/]
12. 1. 10
Tiracchāna kathāsuttaṃ
3852. Mā bhikkhave, anekavihitaṃ tiracchānakathaṃ kathetha: seyyathīdaṃ: rājakathaṃ corakathaṃ mahāmattakathaṃ senākathaṃ bhayakathaṃ yuddhakathaṃ annakathaṃ pānakathaṃ vatthakathaṃ sayanakathaṃ mālākathaṃ gandhakathaṃ ñātikathaṃ yānakathaṃ gāmakathaṃ nigamakathaṃ nagarakathaṃ janapadakathaṃ itthikathaṃ purisakathaṃ sūrakathaṃ1 [PTS Page 420] [\q 420/] visikhākathaṃ kumbhaṭṭhānakathaṃ pubbapetakathaṃ nānattakathaṃ lokakkhāyikaṃ samuddhakkhāyikaṃ itibhavābhavakathaṃ iti vā. Taṃ kissa hetu: nesā bhikkhave, kathā atthasaṃhitā. Nādibrahmacariyakā na nibbidāya na virāgāya na nirodhāya na upasamāya na abhiññāya na sambodhāya na nibbānāya saṃvattati. Kathentā ca kho tumhe bhikkhave, "idaṃ dukkhanti" katheyyātha. "Ayaṃ dukkhasamudayoti" katheyyātha, "ayaṃ dukkhanirodhoti" katheyyātha, "ayaṃ dukkhanirodhagāminī paṭipadāti" katheyyātha, taṃ kissa hetu: esā bhikkhave, kathā atthasaṃhitā esā ādibrahmacariyakā. Esā nibbidāya virāgāya nirodhāya upasamāya abhiññāya sambodhāya nibbānāya saṃvattati tasmātiha bhikkhave, "idaṃ dukkhanti" yogo karaṇīyo. "Ayaṃ samudayoti" yogo karaṇīyo. "Ayaṃ dukkhanirodhoti" yogo karaṇīyo. "Ayaṃ dukkhanirodhagāminīpaṭipadāti" yogo karaṇīyo ti.
Samādhivaggo paṭhamo.
Tatruddānaṃ:
Samādhipaṭisallānā kulaputtā pare duve
Samaṇabrāhmaṇā dve vitakkā cittā viggāhikā kathāti.
--------------------------
1. Surākathaṃ-syā. Sī1, 2,