[CPD Classification 2.5.13]
[PTS Vol Ap 2 ] [\z Ap /] [\f IIa /]
[BJT Vol Ap 2 ] [\z Ap /] [\w IIa /]
[BJT Page 398] [\x 398/]
[PTS Page 511] [\q 511/]
Suttantapiṭake khuddakanikāye
Apadānapāḷi
Namo tassa bhagavato arahato sammāsambuddhassa.
Yavavaggo
551. Yasattherāpadānaṃ
6331. Mahāsamuddaṃ ogayha1 bhavanaṃ
me sunimmitaṃ,
Sunimmitā pokkharaṇi cakkavākupakujitā.
6332. Mandālakehi2 sañchannā
padumuppalakehi ca,
Nadī ca sandate tattha supatitthā
manoramā.
6333. Macchakacchapasañchannā
nānādijasamākulā3,
Mayurakoñcābhirudā kokilādibhi4
vaggubhi.
6334. Pārevatā ravihāsā
cakkavākā nadīvarā,
Dindibhā5 sāḷikā
cettha pampakā jīvaṃjīvakā.
6335. Haṃsā koñcābhinaditā
kosiyā piṅgalā bahū,
Sattaratanasampannā maṇimuttikavālikā6.
6336. Sabbe soṇṇamayā rukkhā
nānāgandhasameritā,
Ujjotenti divārattiṃ bhavanaṃ
sabbakālikaṃta
6337. Saṭṭhituriyasahassāni
sāyaṃ pāto pavajjare,
Soḷasitthisahassāni parivārenti
maṃ sadā.
6338. Abhinikkhamma bhavanā sumedhaṃ
lokanāyakaṃ,
Pasannacitto sumano vandayiṃ taṃ
mahāyasaṃ.
6339. Sambuddhaṃ abhivādetvā
sasaṅghaṃ taṃ nimantayiṃ,
Adhivāsesi so dhīro sumedho lokanāyako.
6340. Mama dhammakathaṃ katvā uyyojesi
mahāmuni,
Sambuddhaṃ abhivādetvā bhavanaṃ
me upāgamiṃ.
6341. Āmantayiṃ parijanaṃ sabbe
sannipatuṃ tadā,
Pubbanhasamayaṃ buddho bhavanaṃ āgamissati.
6342. Lābhā amhaṃ suladdhā
no ye vasāma navantike,
Mayampi buddhaseṭṭhassa pūjayissāma
satthuno.
6343. Annaṃ pānaṃ paṭṭhapetvā
kālaṃ ārocayiṃ ahaṃ,
Vasīsatasahassehi upesi lokanāyako.
6344. Pañcaṅgikehi turiyehi paccuggamamakāsahaṃ,
Sabbasoṇṇamaye pīṭhe
nisīdi purisuttamo.
6345. Uparicchadanaṃ āsi sabbasoṇṇamayaṃ
tadā,
Vījaniyo pavāyanti bhikkhusaṅghaṃ
anuttaraṃ.
1. Oggayha, machasaṃ.
2. Mandārakehi, machasaṃ.
3. Nānādijasamotthaṭā,
machasaṃ, nānāmihasamotthaṭā, syā.
4. Kokilādīhi, machasaṃ.
5. Tittirā, machasaṃ.
6. Maṇimuttavāḷikā,
machasaṃ.
[BJT Page 400] [\x 400/]
6346. Pahūtenannapānena1 bhikkhusaṅghaṃ
atappayiṃ,
Paccekadussayugale bhikkhusaṅghassadāhaṃ.
6347. Yaṃ vadanti sumedhoti2 āhutīnaṃ
paṭiggaho,
Bhikkhu saṅghe nisīditvā
imā gāthā abhāsatha:
6348. "Yo me annena pānena sabbe ime
ca tappayi,
Tamhaṃ kittayissāmi suṇātha
mama bhāsato:
6349. Aṭṭhārase kappasate
devaloke ramissati,
Sahassakkhattuṃ rājāyaṃ
cakkavatti bhavissati.
6350. Upagacchati yaṃ yoniṃ devattaṃ
athamānusaṃ,
Sabbasoṇṇamayaṃ tassa chadanaṃ
dhārayissati.
6351. Tiṃsakappasahassamhi okkākakulasambhavo,
Gotamo nāma nāmena3 satthā
loke bhavissati.
6352. Tassa dhammesu dāyādo oraso
dhammanimmito,
Sabbāsave pariññāya
nibbāyissatanāsavo.
6353. Bhikkhu saṅghe nisīditvā
sīhanādaṃ nadissati,
Citake chattaṃ dhārenti heṭṭhā
chattamhi ḍayhatha. "
6354. Sāmaññaṃ me
anuppattaṃ kilesā jhāpitā mayā,
Maṇḍape rukkhamūle vā
santāse me na vijjati.
6355. Tiṃsa kappasahassamhi yaṃ dānamadadiṃ
tadā,
Duggatiṃ nābhājānāmi
sabbadānassidaṃ phalaṃ.
6356. Kilesā jhāpitā mayhaṃ
bhavā sabbe samūhatā,
Nāgo’va bandhanaṃ chetvā
viharāmi anāsavo.
6357. Svāgataṃ vata me āsi
buddhaseṭṭhassa santike,
Tisso vijjā anuppattā kataṃ
buddhassa sāsanaṃ.
6358. Paṭisambhidā catasso ca
vimokkhā pi ca aṭṭhime,
Chaḷabhiññā sacchikatā
kataṃ buddhassa sāsanaṃ.
Itthaṃ sudaṃ āyasmā yaso thero imā gāthāyo abhāsitthāti.
Yasattherassāpadānaṃ paṭhamaṃ.
1. Pahute annapānena, machasaṃ.
2. Sumedho so, machasaṃ.
3. Gottena, machasaṃ.
4. Mama buddhassa, machasaṃ.
[BJT Page 402] [\x 402/]
552. Nadīkassapattherāpadānaṃ
6359. Padumuttarassa bhagavato lokajeṭṭhassa
tādino
Piṇḍacāraṃ carantassa
vārato uttamaṃ yasaṃ,
Aggaphalaṃ gahetvāna adāsiṃ
satthuno ahaṃ.
6360. Tena kammena devindo lokajeṭṭhā
narāsabho,
Sampattomhi acalaṃ ṭhānaṃ
bhitvā jayaparājayaṃ.
6361. Satasahassito kappe yaṃ phalaṃ
adadiṃ tadā,
Duggatiṃ nābhijānāmi
aggadānassidaṃ phalaṃ.
6362. Kilesā jhāpitā mayhaṃ
bhavā sabbe samūhatā,
Nāgo’va bandhanaṃ chetvā
viharāmi anāsavo.
6363. Svāgataṃ vata me āsi
buddhaseṭṭhassa santike,
Tisso vijjā anuppattā kataṃ
buddhassa sāsanaṃ.
6364. Paṭisambhidā catasso ca
vimokkhā pi ca aṭṭhime,
Chaḷabhiññā sacchikatā
kataṃ buddhassa sāsanaṃ.
Itthaṃ sudaṃ āyasmā nadīkassapo thero imā gāthāyo abhāsitthāti.
Nadīkassapatthepadānaṃ dutiyaṃ.
553. Gayākassapattherāpadānaṃ
6365. Ajinacammavatthohaṃ1 khāribhāradharo
tadā,
Khārikaṃ hārayitvāna
kolaṃ ahāsimassamaṃ.
6366. Bhagavā tasmiṃ2 samaye eko
adutiyo jino,
Mamassamaṃ upaṃgañji3 jotento
sabbakālikaṃ.
6367. Sakaṃ cittaṃ pasādetvā
abhivādetvāna subbataṃ,
Ubhohatthehi paggayha kolaṃ buddhassa’dāsa’haṃ.
6368. Ekatiṃse ito kappe yaṃ phalaṃ
adadiṃ tadā,
Duggatiṃ nābhijānāmi
koladānassidaṃ phalaṃ.
1. Abhinavatthaṃ nivatthohaṃ - sī
2. Tamhi - machasaṃ. 3. Upāgacchi
- machasaṃ.
[BJT Page 404] [\x 404/]
6369. Kilesā jhāpitā mayhaṃ
bhavā sabbe samūhatā,
Nāgo’va bandhanaṃ chetvā
viharāmi anāsavo.
6370. Svāgataṃ vata me āsi
buddhaseṭṭhassa santike,
Tisso vijjā anuppattā kataṃ
buddhassa sāsanaṃ.
6371. Paṭisambhidā catasso ca
vimokkhā pi ca aṭṭhime,
Chaḷabhiññā sacchikatā
kataṃ buddhassa sāsanaṃ.
Itthaṃ sudaṃ āyasmā gayākassapo thero imā gāthāyo abhāsitthāti.
Gayākassapattherassāpadānaṃ tatiyaṃ.
554. Kimbilattherāpadānaṃ
6372. Nibbute kakusandhasmiṃ2 brāhmaṇasmiṃ3
vusīmati,
Gahetvā salalaṃ mālaṃ
maṇḍapaṃ kārayiṃ ahaṃ.
6373. Tāvatiṃsaṃ gato santo
labhimha vyamhamuttamaṃ,
Aññe deve’tirocāmi puññakammassidaṃ
phalaṃ.
6374. Divā vā yadi vā rattiṃ
caṅkamanto ṭhito cahaṃ,
Chatto salalapupphehi puññakammassidaṃ
phalaṃ.
6375. Imasmiṃ yeva kappamhi yaṃ buddhambhipūjayiṃ,
Duggatiṃ nābhijānāmi
buddhapūjāyidaṃ phalaṃ.
6376. Kilesā jhāpitā mayhaṃ
bhavā sabbe samūhatā,
Nāgo’va bandhanaṃ chetvā
viharāmi anāsavo.
6377. Svāgataṃ vata me āsi
buddhaseṭṭhassa santike,
Tisso vijjā anuppattā kataṃ
buddhassa sāsanaṃ.
6378. Paṭisambhidā catasso ca
vimokkhā pi ca aṭṭhime,
Chaḷabhiññā sacchikatā
kataṃ buddhassa sāsanaṃ.
Itthaṃ sudaṃ āyasmā kimbilo thero imā gāthāyo abhāsitthāti.
Kimbilattherāpadānaṃ catutthaṃ.
1. Kimila - machasaṃ.
2. Kakusandhamhi - machasaṃ.
3. Brāhmaṇampi - machasaṃ.
[BJT Page 406] [\x 406/]
555. Vajjiputtattherāpadānaṃ
6379. Sahassaraṃsī bhagavā
sayambhu aparājito,
Vivekā vuṭṭhahitvāna
govarāyābhinikkhami.
6380. Phalahattho ahaṃ disvā upagañchiṃ1
narāsahaṃ,
Pasannacitto sumano savaṇṭaṃ
adadiṃ phalaṃ.
6381. Catunavutito2 kappe yaṃ phalaṃ
adadiṃ tadā,
Duggatiṃ nābhijānāmi
phaladānassidaṃ phalaṃ.
6382. Kilesā jhāpitā mayhaṃ
bhavā sabbe samūhatā,
Nāgo’va bandhanaṃ chetvā
viharāmi anāsavo.
6383. Svāgataṃ vata me āsi
buddhaseṭṭhassa santike,
Tisso vijjā anuppattā kataṃ
buddhassa sāsanaṃ.
6384. Paṭisambhidā catasso ca
vimokkhā pi ca aṭṭhime,
Chaḷabhiññā sacchikatā
kataṃ buddhassa sāsanaṃ.
Itthaṃ sudaṃ āyasmā vajjiputto thero imā gāthāyo abhāsitthāti.
Vajjiputtattherassāpadānaṃ pañcamaṃ.
556. Uttarattherāpadānaṃ
6385. Sumedho nāma sambuddho battiṃsa3
varalakkhaṇo,
Vivekakāmo bhagavā himavanta
mupāgami.
6386. Ajjhogahetvā himavantaṃ aggo
kāruṇiko muni,
Pallanaṅkaṃ ābhujitvāna
nisīdi purisuttamo.
6387. Vijjādharo4 tadā āsiṃ
antalikkhacaro ahaṃ,
Tisūlaṃ sugataṃ gayha gacchāmi
ambare tadā.
6388. Pabbatagge yathā aggi puṇṇamāyeva
candimā,
Vanaṃ obhāsate buddho sālarājāva
phullito.
6389. Vanaggā nikkhamitvāna buddharaṃsī
vidhāvare, 5
Naḷaggivaṇṇasaṅkāsā6
disvā cittaṃ pasādayiṃ.
6390. Vicinaṃ addasaṃ pupphaṃ
kaṇikāraṃ devagandhikaṃ,
Tīṇi puppāni ādāya
buddhaseṭṭhamapūjayiṃ.
1. Upagacchiṃ - machasaṃ.
2. Catunanavutito - machasaṃ.
3. Bāttiṃsa - machasaṃ.
4. Vijjadharo - machasaṃ.
5. Abhidhāvare - machasaṃ.
6. Naḷagagivanasaṅkāsaṃ
- sīmu.
[BJT Page 408] [\x 408/]
6391. Buddhassa ānubhāvena tīṇi
pupphāni me tadā,
Uddhavaṇṭā1 adhopattā
chāyaṃ kubbanti satthuno.
6392. Tena kammena sukatena cetanāpaṇidhīhi
ca,
Jahitvā mānusaṃ dehaṃ
tāvatiṃsamagacchahaṃ.
6393. Tattha me sukataṃ vyamhaṃ2 kaṇikārīti3
ñāyate4.
Saṭṭhiyejanamubbedhaṃ tiṃsayojanavitthataṃ.
6394. Sahassakaṇḍaṃ satabheṇḍu
dhajālu haritāmayaṃ,
Satasassaniyyuhā5 vyamhe pāturahaṃsu6
me.
6395. Sovaṇṇamā maṇimayā
lohitaṅkamayā’pi ca,
Phalikā’pi ca pallaṅkā yenicchakā
yadicchakā.
6396. Mahārahañca sayanaṃ
tulikāvikatīyutaṃ,
Uddhalomiñca ekantaṃ bimbohanasamāyutaṃ.
6397. Bhavanā nikkhamitvāna caranto
devacārikaṃ,
Yadā icchāmi7 gamanaṃ devasaṅghapurakkhato.
6398. Pupphassa heṭṭhā
tiṭṭhāmi uparicchadanaṃ mama,
Samantā yojanasataṃ kaṇikārehi
chāditaṃ.
6399. Saṭṭhituriyasahassāni
sāyaṃ pātaṃ upaṭṭhahuṃ,
Parivārenti maṃ niccaṃ rattindivamatanditā.
6400. Tattha naccehi gītehi tāḷehi8
vāditehi ca,
Ramāmi khiḍḍāratiyā
modāmi kāmakāmahaṃ.
6401. Tattha bhutvā pivitvā ca
modāmi tidase pure,
Nārigaṇehi sahito modāmi
vyamhamuttame.
6402. Satānaṃ pañcakkhattuñca
devarajjamakārayiṃ,
Satānaṃ tīṇikkhattuñca
cakkavatti ahosa’haṃ,
Padesarajjaṃ vipulaṃ gaṇanāto
asaṅkhiyaṃ.
1. Uddhaṃ vaṇṭā -
machasaṃ.
2. Byamhaṃ - machasaṃ.
3. Kaṇikāroti - sī
4. Ñāyati - machasaṃ.
5. Satasahassāni byuhāni - sī
6. Pātubhaviṃsu - machasaṃ.
7. Yathā gacchāmi - sī
Yathā icchāmi - machasaṃ.
8. Tālehi - machasaṃ.
[BJT Page 410] [\x 410/]
6403. Bhave bhave saṃsaratto mahābhogaṃ
labhāmahaṃ,
Bhoge me ūnatā natthi buddhapūjāyidaṃ
phalaṃ.
6404. Duve bhave saṃsarāmi1 devatte
atha mānuse,
Aññaṃ gatiṃ na jānāmi
buddhapūjāyidaṃ phalaṃ.
6405. Duve kule pajāyāmi khattiye
cāpi brāhmaṇe,
Nīce kule na jānāmi buddhapūjāyidaṃ
phalaṃ.
6406. Hatthiyānaṃ assayānaṃ
sivikaṃ sandamānikaṃ,
Labhāmi sabbamevetaṃ buddhapūjāyidaṃ
phalaṃ.
6407. Dāsigaṇaṃ dāsagaṇaṃ
nāriyo samalaṅkatā,
Labhāmi sabbamevetaṃ buddhapūjāyidaṃ
phalaṃ.
6408. Koseyya kambaliyāni khomakappāsikāni
ca,
Labhāmi sabbamevetaṃ buddhapūjāyidaṃ
phalaṃ.
6409. Navavatthaṃ navaphalaṃ navaggarasabhojanaṃ,
Labhāmi sabbamevetaṃ buddhapūjāyidaṃ
phalaṃ.
6410. Imaṃ khāda imaṃ bhuñja
imasmiṃ2 sayane saya,
Labhāmi sabbamevetaṃ buddhapūjāyidaṃ
phalaṃ.
6411. Sabbattha pūjito bhomi yaso accuggato
mama,
Mahāpakkho sadā homi abhejjapariso
sadā.
6412. Sītaṃ uṇhaṃ na
jānāmi parilābho na vijjati,
Atho cetasikaṃ dukkhaṃ hadaye me
na vijjati.
6413. Suvaṇṇavaṇṇo
hutvāna saṃsarāmi bhavābhave,
Vevaṇṇiyaṃ na jānāmi
buddhapūjāyidaṃ phalaṃ.
6414. Devalokā cavitvāna sukkamūlena
codito,
Sāvatthiyaṃ pure jāto mahāsālesu
aḍḍhake.
6415. Pañcakāmaguṇe hitvā
pabbajiṃ anagāriyaṃ,
Jātiyā sattavasso’haṃ arahattamapāpuṇiṃ.
1. Yattha pacchā pajāyāmi
- sīmu.
2. Imambhi - machasaṃ.
[BJT Page 412] [\x 412/]
6416. Upasampādayī1 buddho guṇamaññāya
cakkhumā,
Taruṇo pūjanīyo’haṃ
buddhapūjāyidaṃ phalaṃ.
6417. Dibbacakkhu visuddha me samādhikusalo
ahaṃ,
Abhiññāpāramippatto
buddhapūjāyidaṃ phalaṃ.
6418. Paṭisambhidā anuppatto iddhipādesu
kovido,
Dhammesu pāramippatto buddhapūjāyidaṃ
phalaṃ.
6419. Tiṃsakappasahassamhi yaṃ buddhamhipujayiṃ,
Duggatiṃ nābhijānāmi
buddhapūjāyidaṃ phalaṃ.
6420. Kilesā jhāpitā mayhaṃ
bhavā sabbe samūhatā,
Nāgo’va bandhanaṃ chetvā
viharāmi anāsavo.
6421. Svāgataṃ vata me āsi
buddhaseṭṭhassa santike,
Tisso vijjā anuppattā kataṃ
buddhassa sāsanaṃ.
6422. Paṭisambhidā catasso ca
vimokkhā pi ca aṭṭhime,
Chaḷabhiññā sacchikatā
kataṃ buddhassa sāsanaṃ.
Itthaṃ sudaṃ āyasmā uttaro thero imā gāthāyo abhāsitthāti.
Uttaratherassāpadānaṃ chaṭṭhaṃ.
557. Aparauttarattherāpadānaṃ
6423. Nibbute lokanāthamhi siddhate lokanāyake,
Mama ñāti samānetvā
dhātupūjaṃ akāsa’haṃ.
6424. Catunavutito kappe yaṃ dhātumhipūjayiṃ,
Duggatiṃ nābhijānāmi
dhātupūjāyidaṃ phalaṃ.
6425. Kilesā jhāpitā mayhaṃ
bhavā sabbe samūhatā,
Nāgo’va bandhanaṃ chetvā
viharāmi anāsavo.
6426. Svāgataṃ vata me āsi
buddhaseṭṭhassa santike,
Tisso vijjā anuppattā kataṃ
buddhassa sāsanaṃ.
6427. Paṭisambhidā catasso ca
vimokkhā pi ca aṭṭhime,
Chaḷabhiññā sacchikatā
kataṃ buddhassa sāsanaṃ.
Itthaṃ sudaṃ āyasmā apara uttāratthero imā gāthāyo abhāsitthāti.
Aparassa uttarattherassāpadānaṃ sattamaṃ.
1. Upasampadayi - machasaṃ
[BJT Page 414] [\x 414/]
558. Bhaddajīttherāpadānaṃ
6428. Ogayha yaṃ pokkharaṇiṃ
nānākuñjarasevitaṃ,
Uddharāmi bhisaṃ tattha ghāsahetu
ahaṃ tadā.
6429. Bhagavā tamhiṃ1 samaye padumuttarasavhayo,
Rattambaradharo buddho gacchate anilañjase.
6430. Dhunanto paṃsukūlāni
saddaṃ asso’haṃ tadā,
Uddhaṃ nijjhāyamāno’haṃ
addasaṃ lokanāyakaṃ.
6431. Nattheva ṭhitako santo āyāciṃ
lokanāyakaṃ,
"Madhuṃbhisehi sahitaṃ khīraṃ
sappiṃ mulālikaṃ,
Patitaṇhātu2 me buddho anukampāya
cakkhumā. "
6432. Tato kāruṇiko satthā
orohitvā mahāyaso,
Patigaṇhī3 mama bhikkhuṃ
anukampāya cakkhumā,
Paṭiggahetvā sambuddho akā
me anumodanaṃ.
6433. "Sukhī hotu mahāpuñña
gati tuyhaṃ samijjhatu,
Iminā bhisadānena labhassu vipulaṃ
sukhaṃ".
6435. Tato bhisaṃ gahetvāna āgañjiṃ4
mama assamaṃ,
Bhisaṃ rukkhe laggetvāna mama dānaṃ
anussariṃ.
6436. Mahāvāto uṭṭhahitvā
sañcālesi vanaṃ tadā,
Ākāso abhinādittha asanī
ca phalī tadā.
6437. Tato me asanīpāto matthake
nipatī tadā,
Sohaṃ nisinnako santo tattha kālakato5
ahaṃ.
6438. Puññakammena saññutto
tusitaṃ upapajja’haṃ,
Kalevaraṃ me patitaṃ devaloke ramā’mahaṃ.
6439. Chaḷāsīti6 sahassāni
nāriyo samalaṅkatā,
Sāyaṃ pātaṃ upaṭṭhāhanti
bhisadānassidaṃ phalaṃ.
1. Tasmiṃ - sīmu.
2. Paṭiggaṇhātu - machasaṃ.
3. Paṭigagaṇhi - machasaṃ.
4. Āgacchiṃ - machasaṃ.
5. Kālaṅkato - machasaṃ. 6.
Chalasīti - machasaṃ.
[BJT Page 416] [\x 416/]
6440. Manussayonimāgantvā sukhito
bhoma’haṃ tadā,
Bhoge1 me unatā natthi bhisadānassidaṃ
phalaṃ.
6441. Anukampitako tena devadevena tādinā,
Sabbāsavāparikkhiṇā2
natthidāni punabbhavo.
6442. Satasahassito kappe yaṃ bhisaṃ
adadiṃ tadā,
Duggatiṃ nābhijānāmi
bhisadānadassiṃ phalaṃ.
6443. Kilesā jhāpitā mayhaṃ
bhavā sabbe samūhatā,
Nāgo’va bandhanaṃ chetvā
viharāmi anāsavo.
6444. Svāgataṃ vata me āsi
buddhaseṭṭhassa santike,
Tisso vijjā anuppattā kataṃ
buddhassa sāsanaṃ.
6445. Paṭisambhidā catasso ca
vimokkhā pi ca aṭṭhime,
Chaḷabhiññā sacchikatā
kataṃ buddhassa sāsanaṃ.
Itthaṃ sudaṃ āyasmā bhaddajitthero imā gāthāyo abhāsitthāti.
Bhaddajittherassāpadānaṃ aṭṭhamaṃ.
559. Sīvakattherāpadānaṃ
6446. Esanāya carantassa vipassissa mahesino,
Rittakaṃ pattaṃ disvāna kummasaṃ
pūrayiṃ ahaṃ.
6447. Ekanavutito kappe yaṃ bhikkhamadadiṃ
tadā,
Duggatiṃ nābhijānāmi
kummāsassa idaṃ phalaṃ.
6448. Kilesā jhāpitā mayhaṃ
bhavā sabbe samūhatā,
Nāgo’va bandhanaṃ chetvā
viharāmi anāsavo.
6449. Svāgataṃ vata me āsi
buddhaseṭṭhassa santike,
Tisso vijjā anuppattā kataṃ
buddhassa sāsanaṃ.
6450. Paṭisambhidā catasso ca
vimokkhā pi ca aṭṭhime,
Chaḷabhiññā sacchikatā
kataṃ buddhassa sāsanaṃ.
Itthaṃ sudaṃ āyasmā sīvakatthero imā gāthāyo abhāsitthāti.
Sīvakattherassāpadānaṃ navamaṃ.
Tasasuddānaṃ
Yaso nadīkassapo ca gayākimbilavajjino,
Dve uttarā bhaddaji ca sīvako
cāpi uttamo.
Yavavaggo chapaññāsatimo.
Therāpadānaṃ samattaṃ.
(Raṭṭhapāla - upavāna ttherānaṃ apadānāni "machasaṃ" potthake yasavaggantogadhāni dissante, tathāpi apadānapāḷi paṭhamabhāge dutiya tatiyavaggesu tesaṃ āgatattā idha na dassitānīti daṭṭhabbaṃ. )
1. Bhogā - machasaṃ.
2. Sabbasava parikkhiṇā - machasaṃ.